పాడుదమా స్వేచ్ఛా గీతం

పాడుదమా స్వేచ్ఛా గీతం

ఎగరేయుదమా... జాతిపతాకం

దిగంతాలు నినదించి

విశ్వవిఖ్యాతి నొందగా జాతి గౌరవం.........................||పాడుదమా||

జలియన్ వాలా బాగు దురంతపు

నెత్తుటిధారల నొత్తుకొని

ఉరికొయ్యల చెరసాలల గోడల

దారుణాలు తలకెత్తుకొని

పొగిలిన కాలం... పోరాడిన కాలం...

మరి మరి ఒకపరి తలచుకొని

మృతవీరుల నెదనిడి కొలుచుకొని......................||పాడుదమా||

వందేమాతరమని నినదించిన

వీరుల శౌర్యము నలదుకొని

స్వాతంత్య్రం నా జన్మహక్కని

గర్జించిన గళమందుకొని

పోరాట బలం... స్వాతంత్య్ర ఫలం

కలకాలం కాపాడుకొని

కడు గర్వంగా కొనియాడుకొని... .....................||పాడుదమా||

మన్నెం గుండెల మంటై రగిలిన

విప్లవ జ్యోతి స్ఫూర్తియని

గుండు కెదురుగా గుండెను నిలిపిన

తెలుగు సింగముల తెగువగని........................ ||పాడుదమా||