శివరహస్యం - పరిచయం
-శివరహస్యమ్.
'శివరహస్య' గ్రంథానికి ఋషులు ఇతిహాస స్థానం కల్పించారు. మన వాఙ్మయంలో వేదం ప్రధానమైనది. అంతేకాకుండా పురాణం, ఇతిహాసం, ధర్మశాస్త్రం, మంత్రశాస్త్రం, కావ్యం ఇవన్నీ కలిపి సనాతనధర్మంలో పెద్ద ఆస్తి. ఒకొక్క ప్రక్రియకు ఒక్కో పేరు పెట్టి, వాటి లక్షణాలు కూడా చెప్పారు.
ధర్మార్థకామమోక్షాణాం ఉపదేశ సమన్వితమ్ ||
పురావృత్తం కథాయుక్తం ఇతిహాసం ప్రచక్షతే ॥
ధర్మ, మోక్షాలను నేరుగా ఉపదేశిస్తే అది నీతిపాఠంలా ఉంటుంది. కానీ ధర్మ, అర్థ, కామ, మోక్షాలను ఉపదేశించడానికి పూర్వవృత్తములు అనగా ఇదివరకు జరిగిన వాటిని కలబోసి చెప్తే రసవంతంగా ఉంటుంది. దానిని 'ఇతిహాసం' అంటారు. అదే ఇతిహాసం గొప్పతనం.
రామాయణం, భారతం, యోగవాశిష్ఠం, శివరహస్యం - ఈ నాలుగు మహేతిహాసములని పెద్దలు చెప్పారు.
శివరహస్యం శివసంబంధమైన మహేతిహాసం. ఈ గ్రంథం ఒకప్పుడు చాలా ప్రసిద్ధి చెంది ఉండేది. చాలామంది వారి కర్మకలాపాలలో శివరహస్యంలోనివే చేస్తూ ఉంటారు. కానీ, అవి శివరహస్యంలోనివని తెలియదు.
ఉదాహరణకు మహాలింగార్చన, సహస్రలింగార్చన, పార్థివలింగార్చన ఇత్యాదులు చేసే ముందు సంకల్పంలో ‘శివరహస్యోక్త విధానేన' అని చెప్తారు.
రుద్రనమకాదులతో సమాన స్థానాన్ని పొంది, సర్వులు పఠించదగ్గ 'రుద్రనమకస్తోత్రం', మహాన్యాసంలో చెప్పబడే 'సద్యోజాతాది పంచముఖ ధ్యానం' శివరహస్యంలోనివే.
'యదిహాస్తి తదన్యత్ర యన్నేహాస్తి న తత్క్వచిత్' - 'ఇక్కడ ఉన్నదే ఎక్కడైనా ఉన్నది, ఇక్కడ లేనిది ఎక్కడా లేదని మహాభారతం'లో వ్యాసులవారు ప్రతిజ్ఞ చేశారు. అలాగే శివునికి సంబంధించినవి శివరహస్యంలో ఉన్నవే ఎక్కడైనా ఉన్నాయి. అందులో లేనివి ఎక్కడా లేవని చెప్పవచ్చు.
శివధర్మాలు, శివతత్త్వం ఇత్యాది విషయాలన్ని సంపూర్ణంగా 'శివరహస్యం'లో చెప్పబడ్డాయి. సనాతనధర్మంలో కర్మ, ఉపాసన, జ్ఞానము అని మూడు అంశాలు ఉంటాయి.
కర్మకాండల ప్రస్తావన శివరహస్యంలో కనబడదు. కర్మ అంటే ధర్మము. ధర్మంలో దుష్టత్వం, శిష్టత్వం మధ్య ఘర్షణ ఉంటుంది. ఇలా ఉండాలనే 'విధివాక్యాలు', ఇలా ఉండకూడదనే 'నిషేధవాక్యాలు' ఉంటాయి. ఉపాసనాంగములైన కర్మలు తప్ప, ఇహలోక, పరలోక సుఖాలను ఉద్దేశించిన యజ్ఞయాగాది క్రతువులు ఇందులో చెప్పబడవు. ఉపాసనలో అంతర్లీనంగా ధర్మం ఉంటుంది తప్ప విడిగా చెప్పబడదు. కేవలం శివోపాసన, శివజ్ఞానము మాత్రమే ఈ గ్రంథంలో చెప్పారు......................................
